A Partnership for Green Development

ສຸດຍອດເລີຍ ຊາຜົ້ງສາລີໄດ້ຮັບລາງວັນຊະນະເລີດ ໃນການແຂ່ງຂັນຊາສາກົນ 2019 ທີ່ຮົງກົງ


ສຸດຍອດເລີຍ ຊາຜົ້ງສາລີໄດ້ຮັບລາງວັນຊະນະເລີດ ໃນການແຂ່ງຂັນຊາສາກົນ 2019 ທີ່ຮົງກົງ
August 20, 2019 adminຂ່າວຕ່າງປະເທດ, ຂ່າວທົ່ວໄປ, ສິ່ງທີ່ຄວນຮູ້, ຍ້ອງຍໍ
ຖືເປັນທີ່ຮູ້ຈັກກັນດີວ່າ ແຂວງຜົ້ງສາລີມີຊາທີ່ມີຊື່ສຽງມາຍາວນານ ແລະ ເປັນຜະລິດຕະພັນທີ່ເປັນໜ້າເປັນຕາຂອງແຂວງທີ່ສົ່ງອອກຂາຍຕາມທ້ອງຕະຫຼາດທັງພາຍໃນ ແລະ ຕ່າງປະເທດ ຫຼ້າສຸດສາມາດໄປຄວ້າລາງວັນຊະນະເລີດຈາກການປະກວດຊາສາກົນຢູ່ທີ່ຮົງກົງ ປະຈຳປີ 2019.

ລາງວັນຊະນະເລີດດັ່ງກ່າວນີ້ ເປັນລາງວັນໃນສາຍ “ຊາຜູເອີ໋” ເຊິ່ງຊາທີ່ເຂົ້າປະກວດເປັນຊາຈາກໂຮງງານຊາແສງຄຳ ແຂວງຜົ້ງສາລີ.
ທັງນີ້ ຊາຜູເອີ໋ ແມ່ນມີຕົ້ນກຳເນີດ ແລະ ນິຍົມປູກກັນໃນບໍລິເວນພາກໃຕ້ຂອງແຂວງຢູນນານ ປະເທດຈີນ ທີ່ເມືອງຜູເອີ໋ ເຊິ່ງນັບວ່າເປັນຊາທີ່ດັງ ແລະ ມາແຮງຫຼາຍໃນປັດຈຸບັນ. ຊາຊະນິດນີ້ເມື່ອຜູ້ໃດໄດ້ດື່ມເປັນຄັ້ງທຳອິດຈະຮູ້ສຶກວ່າມີກິ່ນແຮງ ແລະ ລົດຊາດເຂັ້ມຂຸ້ນຫຼາຍ ແຕ່ເມື່ອດື່ມຄັ້ງຕໍ່ໆໄປຈະຮູ້ສຶກຕິດໃຈ.

ການເຂົ້າຮ່ວມແຂ່ງຂັນໃນງານຄັ້ງນີ້ ແມ່ນຢູ່ພາຍໃຕ້ການສະໜັບສະໜຸນ ຈາກກົມປູກຝັງ, ກະຊວງກະສິກຳ ແລະ ປ່າໄມ້ ແລະ ໂຄງການໄບໂອເທຣດ ເພື່ອໂຄສະນາຊາລາວໃຫ້ເປັນທີ່ຮັບຮູ້ໃນຕະຫຼາດສາກົນ.